Ըմպելիքներում կիտրոնի կտորները կարող են վնասել. news.am

Կիտրոնի կտորները, որոնք բարերում եւ ռեստորաններում հաճախ ավելացնում են ալկոհոլային եւ ոչ ալկոհոլային ըմպելիքներին, կարող են վարակ հարուցել: Սա պարզել են Նյու Յորքի համալսարանի բժշկական դպրոցի գիտնականները: Իրենց հետազոտությունը նրանք հրապարակել են Journal of Environmental Health ամսագրում:

Գիտնականները 21 ռեստորաններում ըմպելիքներում եղած կիտրոնի կտորներից քսուկներ են վերցրել: Այդ նմուշների 70 տոկոսում միկրոօրգանիզմների աճ է նկատվել: Հետազոտողներն, ընդհանուր առմամբ, հայտնաբերել են միկրոօրգանիզմների 25 տարբեր տեսակներ, որոնք բոլորը տեսականորեն կարող են վարակ հրահրել:

Հետազոտողների խոսքով՝ ռեստորանների եւ բարերի աշխատակիցները հպվում են կիտրոնին, այն կտրում, կտորները տուփի, գավաթի կամ բաժակի մեջ դնում, որտեղից որոշ ժամանակ անց վերցնում եւ ըմպելիքի մեջ են դնում: Այսպես, միկրոօրգանիզմները հեշտությամբ հայտնվում են կիտրոնի կտորների վրա (հաճախ հենց աշխատակիցների ձեռքերից կամ կեղտոտ մակերեւույթից), իսկ ընպելիքներում ալկոհոլը ոչ միշտ է թունդ, որպեսզի դրանք ոչնչացնի:

Հարցեր, պատասխաններ, մեկնաբանություններ